Osteoporose

A causa do progresivo envellecemento da poboación e da maior esperanza de vida, a osteoporose está a converterse nunha das enfermidades de maior incidencia entre a poboación. A súa orixe está en moitos casos en trastornos hormonais ou nutricionais; por iso, a Sociedade Española de Endocrinoloxía e Nutrición (SEEN) incide en que, á hora de previr e tratar a perda de masa ósea, o especialista ten un papel fundamental. O endocrinólogo deberá realizar un seguimento especializado dos enfermos, valorando os numerosos parámetros implicados, e aplicará o tratamento máis axeitado en cada caso. Ademais dos moduladores do receptor dos estrógenos, outro dos fármacos máis avanzados no tratamento da osteoporose son os bifosfonatos, que recentemente se demostrou que preveñen a aparición de novas fracturas en mulleres con esta enfermidade.

Segundo datos da SEEN, unha de cada tres mulleres sofre polo menos unha fractura por mor da osteoporose ao longo da súa vida, especialmente despois da menopausa. Neste colectivo, a enfermidade supera en incidencia ao cancro de mama ou o infarto. Ante isto, os endocrinos insisten en que cando aparece a primeira fractura é fundamental que a persoa inicie inmediatamente un tratamento para evitar novas roturas.

Ademais da prevención, fundamentada nunha correcta alimentación, o diagnóstico precoz da osteoporose é imprescindible para aplicar un tratamento que evite a primeira rotura. Por iso, os endocrinólogos recomendan ás mulleres incluídas no colectivo de maior risco que se realicen densitometrías óseas de forma periódica, unha técnica que permite medir a masa do óso para comprobar si existe risco de fractura. Con todo, todo iso debe ser valorado polo médico, xa que se trata dunha técnica de alto custo que non é utilizada indiscriminadamente en todas as mulleres postmenopáusicas.

A perda de masa ósea pode ter a súa orixe en enfermidades endocrinológicas como a síndrome de Cushing, o hipertiroidismo, o hipogonadismo ou o hiperparatiroidismo. Por tanto, cando se detecta osteoporose, é moi importante que o especialista en Endocrinoloxía efectúe estudos hormonais para detectar a súa orixe de face a aplicar o tratamento máis axeitado.