Carie dental

A carie iníciase cunha erosión da capa externa do dente, o esmalte, producida tras a formación dunha placa dentaria que no seu inicio pode ser unha acumulación de azucre ou outros hidratos de carbono. 

Os alimentos que conteñen azucres ou hidratos de carbono simples (azucre común ou sacarosa e produtos que a conteñen, mel, marmelada, bebidas tipo cola, lambetadas e doces, etc.) ou hidratos de carbono complexos (cereais como o pan, galletas, arroz, pastas alimenticias, patacas, legumes, etc.) son facilmente degradados na boca por acción dunha sustancia que contén a saliva (alfa amilasa) e por bacterias en compostos máis sinxelos que aumentan a acidez da cavidade bucal, o que destrúe a integridade do esmalte e pode afectar o resto de compoñentes do dente. Con todo, non só se debe ter en conta a influencia destes alimentos ricos en hidratos de carbono na aparición de carie, senón tamén a do resto de alimentos, o grao de hixiene dental, a dispoñibilidade de flúor (indispensable para asegurar a estrutura do esmalte), a produción salivar e factores xenéticos.