Hipertrigliceridemia (Triglicéridos elevados)

Á hora de enfocar a pauta dietética convén saber que a síntese de triglicéridos no intestino está determinada pola inxesta total de graxas, e a formación de triglicéridos no fígado depende do total de calorías da dieta e do total de graxas. Por tanto, adecuar o achegue calórico ás necesidades da persoa controlando a cantidade de graxa total favorecerá o control desta enfermidade.

Por outra banda, a obesidade, o consumo de alcol e a inxesta excesiva de azucres sinxelos precipitan frecuentemente a hipertrigliceridemia, polo que deberá aplicarse unha dieta hipocalórica para reducir o peso en caso de sobrepeso ou obesidade, suprimir de maneira absoluta o alcol e reducir os azucres simples. Cando o nivel de triglicéridos é elevado secundariamente a outras enfermidades, o tratamento debe ir dirixido en primeiro lugar a controlar os procesos de base.