Os problemas de saúde un a un:
Intolerancia ao gluten
A resposta dietética
O tratamento desta enfermidade é exclusivamente dietético e consisten en eliminar os cereais que conteñen gluten e os produtos elaborados a partir deles. É preciso eliminar cantidades moi pequenas de gluten na alimentación. O uso estendido de emulsionantes, espesantes e outros aditivos derivados de grans que conteñen gluten en alimentos procesados comercialmente pode complicar o cumprimento estrito da dieta sen gluten.
Cando se elimina o gluten da dieta, a persoa alcanza un bo estado nutritivo nun período de varias semanas ou meses e desaparece a sintomatología.
Ao comezo da enfermidade pode aparecer intolerancia transitoria á lactosa, e ás veces tamén intolerancia temporal fronte á graxa. Nestas etapas iniciais debe realizarse un control de lactosa e graxa. Cando se controlaron os síntomas, hai que engadir leite e produtos lácteos de maneira progresiva á dieta, e pode aumentarse o nivel de graxa valorando a tolerancia individual.
Por outra banda, será necesario coñecer de forma correcta a etiquetaxe daqueles alimentos que puidesen conter gluten entre os seus compoñentes.
