Obesidade

A Sociedade Española para o Estudo da Obesidade sinala que é unha enfermidade na que se atopan implicados múltiples factores e moitos destes aínda non son do todo coñecidos. Admiten os endocrinos que nalgúns casos de obesidade non poden responder por que unha persoa pode chegar a obesa. Si recoñecen que hai tres factores básicos implicados na orixe da obesidade: o xenético, o ambiental e o sedentarismo, e outros menos importantes como os producidos por medicamentos ou por enfermidades. Aínda, de todos os xeitos, restan moitos interrogantes por resolver.

Non hai un tratamento único para a obesidade, o que reflicte a dificultade que entraña a resolución do problema. Sábese que non todas as persoas responden de igual forma a un tratamento e que cada individuo pode responder de forma distinta a un mesmo tratamento realizado en diferentes momentos da súa vida. Calquera actuación terapéutica ten que ser multidisciplinaria. O obxectivo que se persegue é mellorar a saúde do paciente reducindo os riscos secundarios. En ocasións, o obxectivo será corrixir as alteracións metabólicas, aínda que a redución de peso non sexa moderada e oscile entre un 5 e un 10%.

Os posibles tratamentos poden resumirse así: dietas hipocalóricas (que representen o eixo central do tratamento); exercicio físico (co obxectivo dobre de manter o ton muscular e aumentar o gasto enerxético); a psicoterapia (o soporte psicolóxico é básico no tratamento da obesidade) e os fármacos (dous grandes grupos: os que actúan sobre o sistema nervioso central diminuíndo a sensación de fame e aumentando o metabolismo basal e os que actúan mediante un lixeiro efecto saciante, pero que non poden considerarse como un tratamento da obesidade).

Non debe esquecerse que o tratamento farmacolóxico é unha axuda e que o seu uso racional pode ser de gran valor. Por último, a cirurxía bariátrica está indicada só para obesidades importantes: IMC maior a 40 quilogramos por metro cadrado. Por último, os médicos subliñan que hai que desconfiar dos tratamentos que prometen grandes resultados sen esforzo ou sen dieta; convén afastarse das dietas que prometen rápidas perdas de peso, xa que a maioría destas fano a costa da auga corporal e da masa muscular, e non da graxa como en realidade debería ser.