Kaseinarekiko alergia

ALERGIA ORGANISMOAK SUBSTANTZIA (alergeno) BATEN AURREAN DUEN ERREAKZIO EDO ERANTZUN DESEGOKIA DA. Elikagaiekiko alergian, alergenoa elikagai baten proteina bat da nagusiki, eta harekin konektatzen da irentsiz, ukituz edo arnastuz gero. Behi-esnearen kasuan, proteina guztiek dute ahalmen antigenikoa (alergia eragiteko ahalmena); hala ere, proteina guztiek ez dute sentsibilizazio-ahalmen bera. Kaseinak esne proteinen %84 osatzen duenez, alergia mota hauen kopuru handienean inplikatua dago.

Gure organismoak antigorputzak sortzen ditu, bakterioen, birusen eta abarren infekzioetatik babesteko. Alergia duten pertsonetan, kasu gehienetan, antigorputz bat sortzen da, IgE (E immunoglobulina), alergeno gisa jokatzen duen produktuaren kontra zuzendua. Alergenoaren eta E immunoglobulinaren arteko loturak edozein organo edo sistematan eragiten du alergia-erreakzioa. Hala ere, ohikoena da txoke-organoa larruazala, digestio-hodia edo arnas aparatua izatea, zenbait organori eragiten dion eta pertsonaren bizitza arriskuan jartzen duen erreakzio orokor bat gertatzen denean izan ezik. Erreakzio hori (shock anafilaktikoa) elikagaia hartu eta berehala edo minutu batzuk igaro ondoren agertzen da, eta tratamendu urgentea behar du.

Alergiaren agerpen klinikoek hasiera akutua izan dezakete, bizitzako lehen sei hilabeteetan: beherako larria, gorakoak, sabeleko min kolikoak eta bestelako sintomak (sukarra, sabelaldeko distentsioa); edo hasiera berantiarra, hazkuntzan atzerapena eragin dezakeena, gorozki handiak, sabelaldeko distentsioa eta malnutrizio-zantzuak, hala nola anemia ferropenikoa (ikus Anemiasen kapitulua).